In memory of Betty

She wiz a wee wumman
wi’ a kind hairt
aye trying tae gie ye
somethin’ as a gift
feedin’ a’ the neebors’ cats
withoot fail
and they in return
adorin’ her
Betty’s Buffet
ah callt it

She wiz a wee wumman
wi’ a sad hairt
the early hurts
niver healed richt
a’ the love
stappit up inside insteed

She wiz a wee wumman
wi’ a proud hairt
long ‘oors ‘n years
scrubbin’ flairs
fir posh weans
bein’ beholden tae
naebidy
aye and proud tae
o’ bein’ at times
richt thrawn

She wiz a wee wumman
wi’ a lonely hairt
which she’d no’ admit tae
bit showin ye her treasures
an’ photies o’ a’ the folk
lang gone
she wiz a’ lit up again
taken back tae times
when she wiz maist
loved.